【明報專訊】大熊貓BB家姐同細佬自2月同大家見面後，吸引唔少粉絲去探佢哋。大灣區共同家園青年公益基金噚日辦活動，全額資助近千個來自13間中小學校嘅高小及初中基層學生去探大熊貓。同學仔近距離接觸家姐及細佬，表現雀躍，學生仲分組參與「大熊貓之旅」及「『竹』夢之旅」導覽，透過實地觀察大熊貓嘅棲息環境同食物特點，了解中國喺野外保育同人工繁殖大熊貓嘅科研成果。同學仔亦學習到大熊貓嘅各種食物、從糞便睇健康狀况等冷知識。參加嘅師生另獲交通資助及100元膳食現金券。
大灣區共同家園青年公益基金行政總裁楊彬話今次活動反應熱烈，一共收到超過50間學校、3200個師生申請，足見大熊貓嘅魅力。