【明報專訊】港鐵東鐵線周日（27日）有工程車故障致部分路段單軌雙程行車，服務受阻8個鐘。民建聯主席陳克勤想就事件喺今日嘅立法會大會提出急切口頭質詢，但立法會主席梁君彥認為事件未至於急切到一定要喺今日討論，再次拒批申請。
梁君彥話，對於東鐵接連發生工程車事故深感關注，但留意到政府已要求港鐵全面檢討並提交調查報告，機電署亦將展開特別審核，認為有關事宜即使日後討論亦唔會失去意義，建議陳克勤用其他渠道跟進。
陳克勤同Emily講，話理解梁君彥嘅睇法，而且今日大會嘅議程確係繁重。佢話一早有「兩手準備」，已去信交通事務委員會主席，爭取委員會或轄下鐵路事宜小組委員會召開特別會議，盡快討論事件，最重要係促使港鐵正視問題及交代。
