【明報專訊】近期每逢假日西貢萬宜水庫東壩都迫爆，下星期就係五一黃金周，西貢一二號專線小巴有限公司總經理馮致華噚日話，會加強來往北潭涌及萬宜水庫東壩嘅小巴9A線，平日有六七架車，五一期間將租借其他公司嘅車，加到30架，已經提前培訓司機。
9A線加到30架 「清晒客先收車」
馮致華喺商台《在晴朗的一天出發》話，已經向其他公司租借15架車同一定數量嘅司機，「借車借司機」係全新嘗試，未來其他地方要緊急增加服務都可以沿用。他又話，原本9A線嘅熟路司機教咗新司機路線走法，「教他們邊啲路要避，睇清楚轉彎位」。
佢話，9A線最後一班車仍會寫明係夜晚7點，但當日會聽住司機匯報，因應現場情况加車，強調幾點都會「清晒客先收車」。佢仲提醒遊客「準備定雨遮、水和『時間』」，笑住話如果塞車，20分鐘來回車程可能變成45分鐘，所以要準備乾糧。
另外，九巴今個周末同五一黃金周期間會加密5條西貢路線嘅班次，包括289R、96R、33R、74R同94。
