【明報專訊】無論係公幹定旅行，港人北上已經好普遍，實政圓桌立法會議員田北辰喺復活節假期前後兩次北上，都投訴體驗麻麻。噚日朝早佢坐高鐵上廣州公幹，提早一個鐘到西九龍站，形容候車大堂好似「茶市」咁，座無虛席，好多等車嘅乘客包括佢自己都要企住等，佢就企咗大半個鐘，其間見到乘客愈嚟愈多，幾乎塞滿候車大堂。
田二少話，高鐵通車已經7年，西九龍站嘅配套仲係唔多夠，如果未來列車班次愈開愈多，都唔知點算。佢話同車站職員甚至港鐵都傾過，都話諗唔掂點算，田二少擔心未來10年、20年塞成點，認為政府同港鐵要盡快研究解決方案。
復活節假期第一日，政府早預告係出境高峰期，田二少同中學同學兼高爾夫球波友去中山打波，專登揀港珠澳大橋經珠海去中山，原因係每逢長假期都睇到大橋排長龍嘅新聞，想自己體驗下，結果由金鐘出發去珠海用咗4個鐘，佢今次就無怨言，不過睇到好多過關同行車安排要改善，仲聽聞有人唔跟預約時間都可以過關，話要喺立法會相關會議跟進。
