【明報專訊】民建聯主席陳克勤噚日分享一件開心事，話買到一隻國產復刻版嘅海鷗牌手表，表面仲有「五顆星」同「中國製」嘅字樣。海鷗牌係中國第一個手表品牌，屬當年自主研發產品，係國內名牌。Emily睇番表廠網頁，原來近期做緊70周年推廣，其中一款同陳克勤展示手表相似嘅表款賣666美元（約5200港元）。
中國首手表品牌 70年歷史
網頁資料顯示，1955年海鷗牌製造出中國第一隻手表「五星」，結束咗中國限於手表維修嘅技術，建立咗中國鐘表製造業，仲創造唔少里程碑，包括製造中國第一款空軍計時碼表、自主設計嘅手表、南極探險鐘表。
陳克勤話，手表表面嘅「五顆星」同「中國製」字樣，加上磨砂感表面，令佢諗起先輩喺70年前，通過自主研發、全力鑽研而製造全手工嘅機械手表。佢又話，呢隻手表代表住中國自主研發、勇於探索嘅精神，佢仲拉到國際政治去講，話目前國際風雲變幻，好多行業嘅有識之士正在努力鑽研，實現自主研發技術突破，舉例近期人工智能領域嘅DeepSeek，就令中國人深感振奮。