【明報專訊】特首李家超日前喺禮賓府宴請去緬甸救災嘅特區救援隊，感謝佢哋嘅付出，席間佢都有向救援隊了解喺當地救援情况。其中消防員周子晉分享，今次行動嘅體能需求比想像大，因為平時喺香港訓練一般氣溫最高30幾度，去到緬甸就要面對40度氣溫，體能需要變得唔同，隊內成員都互相支持、鼓勵，仲要做好輪替安排，安排亦要不停調節，佢話呢個都係幾好嘅經驗。
緬甸喺大地震之後仍不時有餘震，部分救援隊成員都話餘震帶來唔少挑戰，單係行路都唔容易。消防員邱賜霆就話，喺災場每做一步都要諗清諗楚，點樣保持安全，仲要諗定萬一要撤離，後退路線係點。而急症科醫生蕭粵中就話，雖然同當地災民喺言語上未必好溝通到，但透過翻譯員都感受到災民好感謝有人幫佢哋。