【明報專訊】海洋公園大熊貓龍鳳胎「家姐」同「細佬」出世近8個月，噚日海洋公園成立咗「家姐細佬後援會」，有興趣成為佢哋契爸、契媽嘅「粉絲」可以畀880元入會，有限期一年，本地或海外人士都歡迎。海洋公園預告下月將舉辦「奶爸奶媽獨家團」，由園方大熊貓護理員帶領，向參與者分享龍鳳胎嘅生活日常。
下月辦「奶爸奶媽獨家團」
海洋公園主席龐建貽話，目前「香港大熊貓官方專頁」累積逾15萬名支持者，希望成立後援會為大熊貓「粉絲」帶嚟更多福利，同時推廣大熊貓保育工作。
後援會會籍唔包括海洋公園入場票，不過入會可以換領迎新禮包，入面包括龍鳳胎嘅百日大掌印擺設及毛巾；可優先預約製作大熊貓「便」利紙、窩窩頭等活動；另有機會參與專屬活動。
園方話，「家姐」同「細佬」𠵱家分別重17.7公斤及18.5公斤。飼養員Mandy分享，呢對龍鳳胎活動已毋須飼養員從旁協助太多；而媽媽「盈盈」為咗訓練仔女喺高處墮下唔受傷，近日經常將龍鳳胎喺樹上推落地訓練。