【明報專訊】選委界議員江玉歡（圖）近日喺立法會「語出驚人」。佢喺涉及電子駕駛執照修例嘅法案委員會上，問政府點樣透過電子駕駛執照便利殘疾人士，但就舉錯例，問「特別係盲人來講有咩便利？」
坐喺佢前一排嘅科技創新界議員邱達根聽到後，即刻擰轉頭發問，同場一眾議員都捧腹大笑，法案委員會主席易志明亦忍俊不禁。江玉歡隨即更正，笑言「盲人……舉錯咗，唔係盲人，其他殘疾人士」，會議廳內笑聲不止。在場能夠「保持冷靜」嘅就只有運輸署代表，佢哋聽完江玉歡嘅問題後仍然不徐不疾咁回應。
江玉歡噚晚喺社交媒體話，知道網上流傳「盲的也能開車？」嘅插圖笑佢，佢開會時太專注睇條文，結果引錯比喻，「我自己也笑了」，如果插圖引起大家不快，佢致萬二分歉意，今後唯有做好啲。
相關字詞﹕江玉歡