【明報專訊】啟德隔離設施將改建做「青年驛站」旅舍及青年文藝體育交流空間，政府之前公布，已批畀由中旅集團旗下集團為主要股東嘅「博盛文旅」營運，土地以短期租約方式，先租5年畀博盛文旅，睇番地政總署近日招標紀錄，每月租金係83,334.5元。
青年驛站最遲10月開始營運，民青局長麥美娟上星期六出席活動後向在場記者公布由博盛文旅營運，當時未提及土地或旅舍嘅租金幾多。博盛文旅其後發稿話，5年內會舉辦60項活動、每個月辦創意市集等。
據地政總署紀錄，佔地97,500平方米嘅啟德承豐道地月租約8.3萬元，租期先定5年，其後按季續租，5年租期租金共約500萬元。土地用途包括舉辦活動、工作坊等，民青局長有絕對酌情決定權，書面批准土地做食肆、零售及服務用途。
相關字詞﹕青年驛站
