【明報專訊】英國樂隊Coldplay周二晚喺啟德體育園主場館舉行首場演唱會，唔少政商界去趁熱鬧，官員方面有財政司長陳茂波及副司長黃偉綸，行會成員葉劉淑儀及立法會議員田北辰都係座上客，連83歲嘅中電董事會主席米高嘉道理都現身主場館。噚日Coldplay第二晚開騷，立法會議員江玉歡就同男友Stefan及其由德國嚟嘅家人去捧場，話場館好靚。
田北辰話當日好忙碌，因為近期視力麻麻，先去搵立法會同事、眼科醫生林順潮檢查，發覺兩隻眼都白內障復發，即時再做激光手術。手術後下晝返立法會開會，晚上趕去啟德體育園，同阿女、女婿及孫女齊齊睇Coldplay。田二少之前鬧過政府同啟德體育園嘅管理協調，但今次睇演唱會就好滿意，大讚Coldplay名不虛傳，表演精彩，又話無論音響同氣氛都好震撼，希望未來香港可以有更多同類型盛事表演。
相關字詞﹕米高嘉道理 葉劉淑儀 田北辰 啟德體育園 Coldplay演唱會