【明報專訊】朝鮮平壤馬拉松啱啱喺周日舉行，係新冠疫後首次復辦，Emily聽到籌辦今次行程嘅旅行社講，今年有3個香港女跑手參加業餘組別賽事，其中袁靖怡以1小時48分奪半馬冠軍，崔嘉怡得5公里賽季軍，何藹蓉就完成全馬。外電報道有逾500人參加，包括200個外地跑手。
籌辦旅社：有22團友
有籌辦今次行程嘅旅行社於社交平台上載賽事相片，參加賽事嘅團員都有亮相。旅行社話，周日平壤朝早天氣好凍，下晝開始暖，賽事開放咗平壤市中心畀跑手，有當地「兩橋一隧」景點，體驗比以前豐富，有3名團友完成賽事並取得佳績。
旅行社職員同Emily講，旅行團行程共7日，有22個團友參加；行程包括準備比賽同參觀景點，團費2.13萬元，參賽費用另計，旅社會幫團友報埋名；一行人今日結束行程，經北京再回港。職員話佢哋一直都有搞開平壤旅行團同馬拉松，2019年嗰屆有個17歲男團友贏咗海外組半馬冠軍。
官方網頁提到今次賽事分為5公里、10公里、半馬同全馬賽事，起點同終點都喺金日成體育場內，參加者會穿過市中心，沿途經過許多標誌性建築同街道，然後前往市中心郊外嘅鄉村，並喺5萬名觀眾見證下完成比賽。