【明報專訊】直資名校拔萃男書院附屬小學毗鄰旺角東站，但無通道直接聯繫，學生要繞大圈返學。Emily之前講過校方同政府各部門商討咗十幾年，終於獲批喺斜坡建樓梯連接兩地。協助推動項目嘅校友田北辰噚日同校方人員去睇工地，見到工程已近成形，話最新消息喺今個學年（2024/25）尾前啟用，校方預咗呢條樓梯7月初正式開幕。佢同校方提出希望工程喺5月底開通時，佢可以做第一個試用嘅校友，感受吓「直通」火車站嘅滋味。
田二少話，有咗呢條直線樓梯就可以方便中學及小學學生，話呢條樓梯約有100級，比原定嘅五六十級多咗，但每十級左右就有一個唞氣嘅landing位，唔會直上直落，話樓梯好闊有2.5米，兩邊有扶手。田二少滿有信心咁話，有咗呢條捷徑，相信會多咗學生搭東鐵返學，咁校門口接送學生嘅家長車車龍應會短咗，有助紓緩塞車。