【明報專訊】文體旅局長羅淑佩舊年上任後首次訪京，噚日佢喺facebook專頁「曬冷」一連3日嘅行程，其中一日喺國家體育總局訓練局榮譽館外「巧遇」中國女排名宿賴亞文（圖左）。同身高1.87米嘅賴亞文相比，局長喺相片中顯得嬌小，身高似乎無礙二人交流，不過局長就無透露傾咗乜。
曾任中國女排隊長嘅賴亞文率領過國家隊喺1996年亞特蘭大奧運會拎銀牌，1999年起出任中國女排助教，其間協助國家隊喺2004年雅典奧運及2016年里約奧運奪金。
羅淑佩形容，官方拜會同活動安排緊密，但喺文體旅局做嘢有個好處，就係唔少活動都新穎有趣，令一段時間無去北京嘅佢，再次被首都「氣魄和豐富文化色彩深深吸引」。佢仲參觀咗黨史博物館，去咗國家大劇院欣賞維也納交響樂團演出，又去埋「海棠花溪」留影，仲隨即轉做fb頭像相。