【明報專訊】政府之前提倡促進夜經濟，實政圓桌議員田北辰噚日喺facebook上載早前去屯門何福堂一帶美食街搵食嘅情况，佢8點半左右去到，發現全部食肆坐唔到一半客，仲畀食客同食肆負責人捉住大吐苦水。
嘆食環阻街上擺枱
田二少一邊食薑汁芝麻湯圓，一邊同食肆負責人及食客傾偈，仲有唔少市民同佢合照。有大排檔食客同負責人向田二少反映，以前可以喺食肆旁嘅行人路擺枱做生意，但近期成日被巡邏嘅食環署人員阻止，建議佢向相關部門爭取。
翻查「政府打擊衛生黑點計劃」網站，田二少去嘅係屯門麒麟徑及達仁坊一帶，條街有不少做小菜嘅大排檔，嗰度因為「阻塞街道」被列為衛生黑點，已改善但未夠兩年，所以仲喺名單上。
田二少同意成條街咁闊，兩邊放幾張枱做生意，喺街邊食更有風味、更受歡迎，認為相關部門加強執法只會令食肆唔好嘅生意雪上加霜。對於昔日勁旺嘅食街變得冷清，佢話有啲感觸，相信要「搞番旺個場」，政府都要諗下計仔。