【明報專訊】開業兩年、曾獲選米芝蓮必比登美食推薦嘅食肆「文苑飯莊」噚日宣布結業，將營業至本月27日。文苑飯莊冇喺帖文交代結業原因，只係話「希望能再次與大家相逢，把這份熟悉的溫度和用心烹製的粵菜美饌，重新帶到你們面前」。
文苑飯莊噚日喺社交平台發帖公布結業消息，形容「心裡有不捨，也有滿滿的感恩」。帖文提到文苑飯莊開業兩年間風雨不曾少過，但團隊當係磨練，「就像香港人一樣，帶著那份獅子山下的韌性，咬緊牙關向前走」，希望能再次與食客相逢，「後會有期，山下再見」。
文苑飯莊位於黃大仙老牌居屋天馬苑嘅商場，2023年開業以來吸引唔少明星名人幫襯，惟去年3月捲入食評爭議。擁逾百萬追蹤者嘅YouTuber馬田發放影片，話喺文苑飯莊嘅用膳體驗差，並遭餐廳禁止拍攝；同日另一頻道播出食評，片中盛讚菜式有水準，可隨便拍攝。至去年底，文苑飯莊傳出欠租一年。