【明報專訊】踏入中學文憑試（DSE）考期，莘莘學子繼續忙溫書。叙福樓集團主席黃傑龍噚日喺facebook話，開放旗下餐廳包括牛角、牛涮鍋MMC及好呷，畀考生當做自修室，講明DSE生「唔需要幫襯（而）有個有冷氣嘅地方溫書」，汽水、咖啡或茶免費任飲，直至今個月30日考試結束。
黃傑龍安排旗下指定餐廳逢星期一至五下晝有3個鐘「變身」做自修室，DSE生可以由兩點半溫書到五點半。佢又話推出「Kabu狀元卡」，考到6個5**嘅DSE生，可以拎一張，張卡有價值1萬元嘅消費優惠券，畀狀元請朋友家人食飯慶祝。
關心DSE學生嘅唔止餐飲界，香港的士小巴商總會日前發起「五星星的士義載」計劃，總會話噚日主科正式開考，出動過百架的士喺各區接送考生，最遠嗰張單係由元朗去小西灣嘅DSE試場，亦有由東涌去柴灣試場。總會秘書長林康頌話，首辦活動，考生反應熱烈，報名人數超額3倍，又話會加推「補貼計劃」，已登記活動嘅考生喺DSE考期內，提供去試場嘅的士發票及准考證等，可以去總會網站申請補助。