【明報專訊】移師啟德主場館嘅國際七人欖球賽前日結束一連3日賽事，綠色和平噚日發表「香港國際七人欖球賽2025即棄餐具統計調查」，推算3日共派發約86萬件即棄餐具，而企業包廂再現「雙重標準」出現大量禁攜容器，包括玻璃酒樽、連蓋膠水樽等，並引述消息話主辦機構欖球總會提出使用重用杯不果。
綠色和平上周末派人到主場館，喺星期六同星期日下晝，分別做3次各半個鐘嘅統計，隨機計算主場館內8個小食亭共16個櫃枱、球迷村8個櫃枱派發嘅即棄餐具數量，同埋主場館內13部飲水機旁提供嘅即棄紙杯數量。
團隊其後按結果推算，發現3日賽事共消耗超過86萬件即棄餐具，包括51萬隻即棄紙杯，佔整體近六成，形容「棄置量驚人」。綠色和平期望園方盡快設立重用杯系統，從源頭減少盛事廢物。
