【明報專訊】噚日政府公布咗幾個委員會嘅委員名單，當中不乏新成員。Emily睇咗新成員名單，發現有唔少人都係政商界、鄉事派嘅後代，包括有元朗區議員沈豪傑出任社區投資共享基金委員會主席，佢原本做緊嘅元朗區體育會主席喺噚日卸任，任內佢搞咗銀髮運動班、推動新興運動等。
沈豪傑任投資共享基金委會主席
新界潮人總會永遠榮譽主席莊健成嘅囡囡莊翠珊、全國政協委員容永祺嘅囝囝容思瀚出任公民教育委員會委員，全國政協常委兼麗新集團主席林建岳嘅囡囡林顥伊出任青年發展委員會成員。
唔止名人後代，Emily見到有運動員代表，包括喺上年巴黎奧運拎咗女子重劍個人賽金牌嘅江旻憓，獲委任為青年發展委員會成員，香港羽毛球代表隊前成員陳念慈本身有不少公職，今次就獲委任為社區投資共享基金委員會副主席。
房屋委員會都有新成員，包括立法會議員梁文廣同陸頌雄，仲有教育大學前校長張仁良。
