【明報專訊】立法會舊年去日本職務考察，行程內容同費用引起唔少爭議，立法會噚日公布今次嘅考察報告，共有117頁，細列參觀過嘅地方、見過嘅官員及團體，以及香港可以借鏡嘅建議。不過一如之前啲考察報告，無交代行程實質使費。
見日清董事長 去豐洲市場
睇番一連4日行程，參觀同拜訪活動集中喺第二、第三日，第二日去咗橫濱市參觀「景點」兼同相關負責人會面，包括參觀橫濱日清杯麵博物館同橫濱中華街時，分別與日清集團董事長兼首席執行官安藤清隆同中華街發展會副理事長武松昭男會面，後者講到發展會恒常舉辦推廣中國文化活動，亦好大力推動大熊貓經濟，考察團就話現場見到「熊貓包」好受年輕人歡迎。
第三日主要參觀豐洲市場及同當地官員會面，考察團認為香港嘅機場城市嘅空運鮮活市集可參考豐洲市場嘅設計做發展藍本，要畀市民體驗海鮮拍賣及即場品嘗鮮活海產。
考察團提出多項建議，其中認為廟街同橫濱中華街相近，但廟街嘅販商商會唔同發展會，對街道整體管理等無實質權力；另「廟街夜繽紛」搞咗一年後，旅發局就退場，商販繼續搞都難以管理，建議政府加強支持市集商戶同提升商會角色。