【明報專訊】奢侈品牌Louis Vuitton（LV）同日本藝術家村上隆合作，喺巴塞爾藝術展（Art Basel）香港展會場館內展示佢嘅作品，前日（26日）品牌仲邀請佢去半山寶珊道28號一間豪宅參加派對。不過，有網民就喺社交平台Threads投訴，話活動期間播放嘅派對音樂好嘈（Threads截圖），忍唔住打電話報警，甚至有人留言話音樂聲「成座山都聽到」、嘈到瞓唔到；有網民就引述「LV經理」話，嘈到居民唔好意思。Emily向LV查詢，截稿前未有回覆。
警方回覆Emily話，分別喺星期二（25日）同前日（26日）接獲報案投訴，同樣列作噪音投訴處理。其中警方喺25號晚上8點幾，收到約4至5宗報案，投訴寶珊道28號有強勁音樂噪音，警員到場時，發現一個名牌手袋嘅活動綵排已經結束，未能跟進；前日就喺夜晚9點半左右接獲市民報案，警員到場見到搞緊派對，不過當時音量屬可以接受，派對最終喺晚上約11點半完結。