【明報專訊】大律師公會早前擴大法律義助服務計劃，公會噚日包場睇講聽障者嘅電影《看我今天怎麼說》，請計劃下4間非牟利組織一齊睇戲同映後座談。唔講唔知，原來今次公會係第一次戲院包場搞慈善放映會。公會主席毛樂禮（Jose，前排中）致辭時話，《看》表達平等信息，同公會支持法律義助服務、確保所有人得到專業法律支援、維護司法公義嘅理念一致，希望藉此答謝合作伙伴。佢又話，期望義助服務計劃幫到更多需要免費法律諮詢嘅市民。
身兼善導會執委嘅區域法院法官李慶年（前左）、港大法律學院臨牀法律教育課程統籌林勁豐、公益法香港董事楊正綱、同平義社創辦人麥雅杜都有出席。同場仲有立法會法律界議員林新強（前右）、法援署前署長鄺寶昌同深水埗民政事務專員黃昕然。據聞正參加城大中國法律課程嘅內地法官都有一齊睇戲。