【明報專訊】一旦電壓驟降或停電，往往易導致升降機停運困𨋢，實政圓桌立法會議員田北辰噚日喺facebook透露，「成功爭取」機電署將會強制所有新𨋢，如果大廈無裝後備供電系統，就必須安裝「自動拯救裝置」（ARD），即使停電，部𨋢仍會繼續運行到最近嘅樓層開門，防止困𨋢。機電署回覆Emily，今年6月後裝的升降機都適用。
田北辰成功爭取 話大減停電致困𨋢
翻查資料，機電署2009年修訂《升降機及自動梯設計及構造實務守則》，要求2010年後安裝嘅升降機需配備「電壓驟降緩解過渡裝置」（PVDO），令升降機識得去最近樓層開門疏散乘客，但只適用於電壓驟降時；而ARD就停電時都用到。田二少話，機電署2019年再修訂《守則》時都無要求升降機必須裝ARD，容許坊間二選其一，結果舊年中電發生幾單供電事故，幾乎每次都致困𨋢，故舊年起佢就向機電署提出應該強制所有𨋢安裝ARD。
噚日田二少話機電署「報喜」話已更新要求，將來新𨋢除咗要有PVDO，如果大廈無後備供電系統，必須配備埋ARD。佢話好歡迎相關安排，相信可「一勞永逸」，大大減低停電或電壓驟降而困𨋢嘅意外。
