【明報專訊】今年初入境處宣布放寬使用e-道服務嘅適用年齡，噚日處方正式公布，下周一（31日）起，7歲或以上嘅香港永久居民，拎住智能身分證同特區護照，就可以用e-道過關。入境處預計約20萬名兒童受惠。
目前持智能身分證並年滿11歲或以上嘅合資格香港永久居民，可以用e-道服務，入境處公布，下周一起，7歲至10歲、身高1.1米或以上嘅香港永久居民，持有相應證件，毋須預先登記，就可以喺各管制站用e-道服務，以容貌識別技術自助辦理出入境檢查手續。入境處話，今次調低e-道嘅適用年齡係為進一步提升管制站嘅通關效率。
入境處今年初話，最快第三季喺機場入境大堂推出新款「e-道」，香港居民毋須預先登記，亦毋須出示旅行證件或二維碼，入境時就可以容貌識別技術核實身分。
