【明報專訊】為加強同內地人才聯絡，人才辦早前登陸內地社交媒體「小紅書」，噚日發布新宣傳片，請嚟勞福局長孫玉菡參與拍攝。孫玉菡喺宣傳片召集「人才小隊」，向隊員「T Sir」、「E姐」發布兩項任務，包括提高人才防騙意識，同推廣香港嘅人才服務，人才辦話呢兩項任務正係佢哋內地推廣嘅目標。
人才辦話今次特別邀請孫玉菡拍片，向小紅書用戶介紹兩名人才辦隊員，其中「T Sir」寓意「Talent」，未來會集中發放官方信息同闢謠；「E姐」寓意「Engage」，負責提供來港生活攻略，例如點樣搵工、租樓，支援人才落戶香港。發言人又大讚孫玉菡拍片表現專業，仲話大家如果有興趣可以去小紅書關注佢哋嘅帳戶。此外，人才辦亦透過微信、LinkedIn（領英）等發布資訊。