【明報專訊】內地巨型電商攻港動作不斷，當中京東（9618）宣傳「買貴即賠」，搶佔香港市場。營運HKTVmall嘅香港科技探索（1137），公司副主席兼行政總裁王維基噚日公開話：「都幾好笑，堂堂京東的Apps，竟然八九成模仿我們HKTVmall，連圖案都『學』得似模似樣，把我們抬舉了。」
「HKJD mall」版面相似
睇番京東App，當用戶設定為港澳地區，頁面會顯示一個「HKJD mall全港比價」嘅位置，按入去嘅版面設計與HKTVmall 版面幾相近。京東噚晚亦喺facebook發文回應王維基，但無回應有冇抄HKTVmall設計嘅問題。京東話多謝王生嘅關注，「我哋完全明白王生對於京東開拓香港市場的疑慮」，仲話既然王生開咗個頭，就宣布京東App會推行買電器免費上門安裝嘅優惠。
王維基喺facebook話，佢賣煲嘅標價499港元，京東賣差唔多樣嘅煲，售338元人民幣，王問：「真係平啲？」佢話佢哋賣嘅係瑞士製造，京東賣嘅係另一牌子。佢又話「為什麼你的『買貴即賠』只包括百佳、惠康、百老匯和豐澤？為什麼不包括我們HKTVmall在內？」，「係睇我唔起，定抑或因為唔夠我哋平？」並稱「你兵不厭詐，我兵來將擋，我哋要努力」。