【明報專訊】世衛西太平洋區域主任Saia Ma'u Piukala上任後首度訪港，周一、周二先後同醫衛局長盧寵茂、衛生署、中大醫學院創新診斷科技中心、港大公共衛生學院院長David Bishai等會面交流。Piukala醫生噚日喺社交網站總結行程話，世衛重視香港喺新冠抗疫期間嘅公共衛生措施、有力嘅控煙措施等。
Emily留意到，衛生署長林文健同Piukala見面交流香港醫療制度、處理新冠策略、控煙等時，署方準備咗蛋撻同奶茶招呼客人。Piukala今次拜訪另一睇頭係中醫藥發展，包括到訪衛生署政府中藥檢測中心，又喺衛生署人員陪同下到訪山頂夏力道步行徑。衛生署前日話一行人觀賞本地野生藥用植物，包括香港大沙葉、金毛狗脊同粗葉榕等物種。
Piukala形容今次旅程大開眼界，見到香港喺公共衛生、診斷、機械同藥物方面嘅領先地位。
相關字詞﹕世衛