【明報專訊】「台上一分鐘，台下十年功」，演粵劇對一般人並唔易，對唐氏綜合症患者就更需額外嘅努力同堅持。「唐氏粵劇團」喺本月21日「世界唐氏綜合症日」，會喺沙田大會堂演奏廳舉行《心繫唐氏慈善粵劇晚會》，演出經典作品包括《帝女花》及《蝶影紅梨記之窺醉》等，門票100至1000元不等，扣除成本後，將撥捐香港唐氏綜合症協會作服務發展。
其中一名演出者係今年41歲嘅楊嘉茵，身為劇團創立團員之一嘅佢，至今加入劇團近18年。唐氏綜合症患者較早出現退化症狀，媽媽發現嘉茵嘅身體同記憶力都有退化，因此排練只要稍為改動，嘉茵便好難適應；而患足底筋膜炎嘅嘉茵，企得耐會痛，亦影響日常工作同演出。
唐氏粵劇團話嘉茵並無因為身體障礙而放棄，喺晚會甚至挑戰新角色，扮演天庭嘅玉女一角。佢每日透過錄音帶加強練習，希望以易於理解嘅形式熟習劇本。即使腳痛令佢排練時經常要坐低休息，但佢仍將每個細節記到實。Emily預祝佢哋表演順利，喺舞台綻放光芒。