【明報專訊】全國人大會議噚日喺北京閉幕，唔少人代趁機交朋友、影相打卡。港區人大代表、教聯會主席黃錦良就話，噚日有幸同小米集團董事長雷軍隔一個位坐，一齊喺人民大會堂審議多份工作報告及交流，佢仲收到禮物，就係有雷總簽名嘅人大紀念封，上面寫住「祝香港教育工作者聯會明天更美好」。
港區人代人均受訪逾10次
今年一眾港區人代喺兩會期間接受咗超過400次傳媒訪問，圍繞大會議程發表咗154次建議。Emily計番，即係平均每名港區人代喺兩會受訪超過10次、提出建議4次，港區人大代表團副團長吳秋北喺facebook話反映港區人代依法履職盡責，積極建言獻策，又話感受到傳媒嘅熱情，大家都希望透過訪問傳達兩會精神，將國家政策同聲音帶返香港之餘，更傳向海外，說好中國故事。
全國人大常委會委員長趙樂際因為呼吸道感染，缺席噚日嘅全國人大會議閉幕會，多名人代都話有啲失望，希望對方盡快康復。部分港區人代兩會期間都病咗，全國人大常委李慧琼噚日話早前感覺到流感症狀，所以都請病假，缺席一節會議。