【明報專訊】上月有休班醫護喺荃灣西站外為途人急救時，港鐵職員被指未有提供心臟除顫器（AED）。「中科監察」主席潘焯鴻日前發帖話，港鐵更新咗職員指引，列明只要收到求助，當值站長要立即安排AED急救，唔限於港鐵範圍內；緊急時公眾可直接借用港鐵AED，職員要立刻告知AED位置，唔使查核身分。港鐵同Emily講，會不時審視車站管理嘅工作指引，有需要就會更新，更新相關指引係想再次提醒員工，強調過往車站職員曾多次攜帶AED到車站範圍外為有需要乘客急救。
港鐵話，自2021年車站大堂及月台等加設AED，方便市民緊急時取用，唔限範圍，有需要時車站職員亦可協助。
曾喺港鐵工作嘅立法會議員張欣宇話以往內部「信息清楚」，一直表明職員可借出AED，更新指引可加強提醒，而且上月事件引起熱議，相信寫清楚指引可釋除疑慮。
相關字詞﹕心臟除顫器
