【明報專訊】律師會推動修例引入律師樓可用律師法團模式營運，立法會司法及法律事務委員會周五（14日）會傾呢個議題。Emily留意到，由法律界議員林新強擔任主席嘅委員會，日前邀請司法機構政務處出席會議，但司法機構以律師會自我規管制度下提出修例而婉拒咗，截至噚日，議程連律政司都無代表，得律師會代表參加。聞說有議員對此有意見，唔知會唔會重演林新強批評律政司推動律師行業發展步伐嘅情境？
話角色唔適合出席
根據司法機構政務處回覆立法會信件，話跟其他法案唔同，今次由律師會提出修改《法律執業者條例》附屬法例，最適合由律師會向委員會解釋。本身修改相關執業規則需要終審法院首席法官批准，司法機構話首席法官角色都係把關，實際改例都係律師會做番，而首席法官張舉能已原則上同意修例，若評論嘅話，可能僭越首席法官最終決定嘅權力，認為唔需要亦唔適宜出席會議。
司法機構又話，睇番同一委員會2002年同2014年討論相同議題，司法機構都無出席，不過當時律政司就有人出席會議。
