【明報專訊】內地舊年起推動全國「體重管理年」3年行動，身兼全國政協嘅國家傳染病醫學中心主任張文宏噚日出席兩會時，主動指一名追訪嘅香港無綫男記者「像你就太胖了啦，要弄得瘦一點」。
國家衛健委主任雷海潮喺前一日記者會呼籲，酒店喺房間入面放個磅磅重，並會引導醫療衛生機構設體重門診，為超重或慢性病者提供協助。
張文宏喺傳媒圍訪時話，目前主要加強基層資源，然後輕拍該名無綫記者話：「像你就太胖了啦，要弄得瘦一點。我們（體重管理）3年行動計劃，主要是體重減下來，體重減下來（有助）慢病控制。像你這樣大的肚子是我們的主要目標。」該名記者就笑咗兩聲。
有關片段喺內地廣傳，衝上部分社交平台話題。新浪微博上有「張文宏說採訪他的記者肚子太大」話題，有內地網民覺得張一如以往尖銳，不過都有人話佢唔太厚道，亦有人覺得身形一回事，最緊要係健康。
張文宏曾喺2021年新冠疫情期間，以專家身分提及「長期看要與病毒共存」說法，當時受到唔少質疑，但佢其後回應形容社會有質疑、有討論，才會有發展。