【明報專訊】Emily日前報道，新加坡人力部長陳詩龍喺國會辯論，用廣東話質疑在野黨前進黨議員梁文輝「講你又唔聽」，事隔一日梁文輝用番廣東話拍片「回敬」部長，話對方一直無提供相關數據就喺度「發狼戾」，相信公道自在人心。佢並大聲批評部長「高高在上」，唔知民間疾苦。
李顯龍太太內政部長轉載官員片
新加坡人力部長陳詩龍用劉德華《江湖》中經典對白回應梁文輝質疑人口數據，片段喺新加坡網上廣傳，新加坡國務資政李顯龍嘅太太何晶同內政部長尚穆根都有即日轉載。
祖籍廣東嘅梁文輝一日後去到小販中心飲茶，兼拍片回應陳詩龍。梁講到街坊問佢，對部長喺國會鬧佢「講極都唔明」點睇，佢話「咁要睇你講乜嘢嘅，咁你講咗等於無講，講來講去三幅被，咁當然我要一問再問啦」。梁重申佢想追問當地就業資料，就業等數據將新加坡人同永久居民嘅數據混合，佢想問當局可唔可以分番開，「佢一直無答我，𠵱家喺度發狼戾」。
梁總結時意有所指話：「咁又難怪嘅，部長佢高高在上，點會理解到人民嘅生活困難呢？」陳詩龍無喺網上進一步評論事件，佢日前落區解釋預算案，同埋趁三八婦女節向市民派花。