【明報專訊】加入律師會近25年、其中14年擔任秘書長嘅朱潔冰（Heidi），係律師會有史以來在任最長嘅秘書長之一。律師會會長湯文龍（Roden）喺會員定期通函宣布Heidi下月退休，由副秘書長李昱潁（Wendy）接任。
Roden喺通函提及，Heidi喺2001年加入律師會，擔任過多個崗位，2011年起做秘書長，係1984年會方設呢個職位以嚟首個女秘書長，對佢退休心情複雜。律師會會員由2011年約8000人增至𠵱家約1.3萬人，Roden讚揚Heidi支持律師會發展，同埋加深咗國際同內地聯繫，仲協助理事會度過2019年反修例事件、疫情同科技發展。
接任秘書長嘅Wendy喺2008年加入律師會，一開始喺秘書處擔任會員服務部總監，2022年1月擔任副秘書長。
另外，律師會轄下法律專業學會將成立普通法中心，Roden喺通函解釋，希望喺自負盈虧基礎下，幫手設計同提供普通法培訓課程，吸引更多非普通法司法管轄區嘅學術機構同法律界合作，協助培育涉外法律人才。