【明報專訊】全國政協十四屆三次會議噚日開第二次全體會議，之前幾日開會，人代政協都唔可以帶手機入大會堂，同外界暫時「失聯」。不過噚日嘅全體會議就破例畀大家帶手機，唔少港區政協都乘機打卡留念，其中身兼立法會議員蘇長荣就搵到中國女排代表丁霞合照。
據了解，一班人代政協去大會堂開會，唔止唔可以帶手機，有藍牙功能嘅運動手表等通訊設備都唔帶得，一係自己放喺酒店，一係進場前「繳械」，放喺接載佢哋嘅旅遊巴。
有人代私下同Emily講，開會時都想認識其他地區嘅人代政協，但無手機就唔多方便，無得掃碼互加微信，所以會帶定啲卡片去開會。有政協又話，之前試過容許帶手機入大會堂，但場內全面「封網」，乜信號都收唔到，出大會堂後部手機都仲會「傻傻下」，要關機再開先回復正常。
同係身兼立法會議員嘅港區政協李鎮強，亦同前民政局長、港區政協劉江華合照。對於今次開會內容，李鎮強話有14個委員就唔同議題發言，包括點樣提振消費、發展銀髮經濟、推進海洋科技創新等，唔少建議都適用於香港，因此會將合適嘅建議喺立法會提出，希望特區政府可以考慮。