【明報專訊】已解散嘅支聯會拒交資料案噚日終極上訴得直，撤銷定罪同判刑，判辭亦有提及保安局長角色。保安局長鄧炳強一直重視呢單案，裁決頒布後，唔少記者都想搵鄧局長回應，打算趁佢原定噚日下晝出席活動時訪問佢，不過主辦方臨時接獲通知，話鄧局長要離港處理公務，去唔到，令唔少記者撲空。
問責官員離港辦公，政府通常都會刊憲公報署任安排，但噚日係憲報就唔見。Emily向保安局了解緊局長係咪離港、去咗邊度公幹，至截稿時仲等緊回覆。
慈善機構「藝文發展基金會」舊年11月設立以「三國」為主題嘅沉浸式互動體驗館，鄧炳強原定噚日下晝去大嶼山昂坪出席活動，但主辦方喺「活動前一小時接獲通知」，話鄧要離港處理公務，改為喺機場拍片畀主辦單位以示支持，就未能到場致歉。活動由保安局副局長卓孝業頂上。
鄧炳強之前喺2021年10月回應立法會議員質詢提到支聯會案件嗰時，曾經講過「採取任何執法行動，都是根據證據、嚴格依照法律」。