【明報專訊】政府推動清真友善旅遊，土耳其駐港總領事館噚日同酒店喺穆斯林齋戒月舉辦開齋晚宴，現場除咗特色烤肉同甜品，仲有清真片皮鴨、點心、壽司，連清真爆谷都有，Emily試過幾道菜，味道唔錯。
美麗華集團酒店及服務式公寓總監韋瑞民同Emily解釋，為咗令餐廳符合清真友善要求，所有雪櫃同食物原材料都分隔同清楚標示，避免撈亂，同時改用食材，例如燒賣由豬肉改為雞肉同蝦。佢話一開始要花啲力氣去搵提供清真食品供應商，如果有新菜式就要重新認證，都幾嚴格。
加沙第二齋月 盼盡快和平
總領事艾烏勤話，試過有高層次訪問團由土耳其來港，都特登要試清真點心。佢以水漲船高比喻，相信清真概念受歡迎下，各持份者都得益。艾烏勤致辭時又話，齋戒月係反思時刻，今年係加沙經歷第二個齋戒月，祈求盡快有永久和平。