【明報專訊】全國兩會喺北京舉行，噚日政協會議先開幕。Emily發現今年部分立法會議員都有刊登廣告祝賀，多數都係佔八分之一版面，包括身兼全國人代嘅陳曼琪、陳仲尼等；亦有議員刊登四分之一版廣告，包括勞聯林振昇、周小松聯名刊登，而經民聯陸瀚民就孖住太太洪綺敏聯名登。唔知下星期兩會閉幕時，各界嘅廣告數量又如何呢？
以往兩會開幕同閉幕嘅日子，唔少社團同商界等都會出動廣告攻勢，喺唔同報章刊登廣告祝賀。Emily噚日都有留意下各大報章嘅廣告，其中以《文匯報》最多，數數下都有成20版，都係慶祝兩會開幕；其次係《大公報》，有16版。
江蘇社團總會永利澳門重本刊全版
Emily亦留意到，多數登半版廣告嘅都係社團同政界，其中香港江蘇社團總會等直頭刊登全版，真係夠重本顯示誠意；至於商界方面，大部分都係刊登四分之一版廣告，不過凡事總有例外，好似永利澳門有限公司就刊登全版廣告，信德集團都有半版。