【明報專訊】全國兩會本周開幕，港區人大代表團噚晚舉行會議，選出馬逢國擔任團長。今年港區人代同政協繼續分別入住北京飯店與華彬費爾蒙酒店，兩處保安同樣森嚴，但安排有別，人代入住嘅酒店畀記者入內採訪，政協住處就要求記者於門外等候。
噚日北京天氣寒冷，政協入住嘅酒店只准政協及工作人員入內，記者須於門外守候。部分政協主動上前關心在場記者，其中政協胡劍江到埗時慰勞Emily與行家，請大家食朱古力同堅果。政協常委唐英年、政協陳清霞等亦同記者打招呼。
港區人大代表團噚日到北京後舉行團內會議，馬逢國再做團長，副團長為吳秋北及陳勇。馬逢國透露，有一名人代因為身體不適請假，至於過去兩年都請假嘅陳曼琪今年有隨團上京，亦係佢今屆任內首次出席兩會。
一眾港區人代今日將出席人大預備會議，選出大會主席團及秘書長。吳秋北話，今年係十四五規劃「收官之年」，十五五規劃出台在即，盼推動香港貢獻國家發展所需。陳勇就話大家都好關注促進經濟、支持民營企業嘅措施。