【明報專訊】前特首、全國政協副主席梁振英（CY）近期頻頻關注香港輸入人才事宜，前晚佢喺facebook再次發文，引述政府數字話前年唔同人才入境計劃有約22.1萬宗申請，舊年約20.8萬宗，即兩年有超過40萬宗申請，質疑「政府有足夠人手確保申請人呈交的資料真實嗎？」
勞福局長孫玉菡噚日被問及CY最新言論時，話𠵱家入境處接收輸入人才申請係全電子化，收咗申請後當然要查核申請人畀嘅資料係咪準確，如牽涉學歷，申請人要搵第三方認證機構認證。
佢仲話，今年預算案宣布咗各項人才入境計劃要收申請費，亦上調簽證費，每年會收多約6.2億元，足夠收回成本，確保每年有資源返嚟做好工作，強調每個審批「我哋都會好小心、好審慎」，確保符合要求先會批出申請或續期。
CY早排出帖關注部分申請本港人才計劃嘅內地居民來港報到後馬上返內地，質疑佢哋只為方便出入香港、子女可報讀本港學校等，有違香港人才政策嘅原意。
