【明報專訊】屹立北角半世紀嘅新光戲院今日（3日）結業。Emily噚日到現場觀察，見到唔少男女老幼都喺度打卡，新光戲院「全院滿座HOUSE FULL」旗、投幣磅重機、門外霓虹招牌等都成為拍攝目標；亦有人喺戲院門前畫畫，記錄新光戲院最後時光。營運新光戲院12年、「盛世天」戲劇團創辦人李居明噚日喺社交平台facebook表示，噚日下晝有40幾名市民一齊到新光畫畫，形容場面感人、香港有情。
HOUSE FULL旗霓虹招牌受歡迎
立法會選委界別議員江玉歡亦喺facebook發文抒發感受，話對新光戲院結業深感惋惜，噚日仲去咗捧場。江玉歡話，入場睇粵劇《小平你好》時全場滿座，觀眾掌聲不斷，大家都面露不捨，而戲院外嘅霓虹招牌即將隨住戲院結業而熄燈，慨嘆城市發展嘅代價，就連半點歷史都留唔住。
李居明：香港有情
新光戲院今日上演最後一齣粵劇《小平你好》後，晚上約11點會由李居明主持「熄燈落閘告別儀式」，一代粵劇殿堂終須落幕。