【明報專訊】房委會舊年推出「共築．創業家」計劃，旗下商場部分舖位免租7個月租畀年輕人創業。房屋局長何永賢噚日出席預算案記者會時親身幫計劃賣廣告，專登戴咗其中一間創業店舖賣嘅綠色花型心口針同耳環，仲話如果記者有興趣，會後可以聯絡局方。
計劃對象係35歲或以下嘅青年，目前7個喺九龍同新界嘅商場參與，包括油塘大本型、鑽石山啟鑽商場、深水埗海麗商場、葵涌商場等，如果參加者喺計劃中賺到錢，房委會會收番淨利潤嘅20%，以支持計劃持續發展。何永賢話收到180份建議書，入圍者全部已經做緊生意，有啲係幫助流浪貓、有啲做時裝，將啲衫「升級轉型」，局方希望佢哋創業成功，慢慢變成真正租客。
何永賢透露局方打算向私人商業項目推介呢個計劃，仲話預算案公布後，已經有幾個私人發展商話好願意支持。