【明報專訊】一年一度嘅康文署花展下個月14號起喺銅鑼灣維園舉行，為期10日，朝九晚九，今年主題花揀咗「秋英」。康文署話，秋英嘅生命力強、花色豐富、花期持久，又易栽培同養護，係點綴環境嘅好選擇，但原來仲可以食得，佢嘅全草可以做中藥，有清熱解毒功效。
秋英原產墨西哥，據康文署介紹，經過多年來嘅天然傳播同人工雜交繁殖，秋英已經有好多變種、栽培種，有粉紫、桃紅、洋紅、粉紅同純白等純色品種，亦培植出雙色、鑲邊、條紋同內圈染暈等特別品種，仲有捲狀、舌狀花或重瓣等形態。
花展門票14元，60歲或以上、殘疾人士及其照顧者、兒童同全日制學生半價，如果周一至周五入場，長者、殘疾人士及其照顧者免費。花展仲有不同相關比賽同活動，詳情可以瀏覽網頁（https://shorturl.at/CnxSH）。
相關字詞﹕花展