【明報專訊】政府將調整兩蚊乘車優惠計劃，不過就因為需時調校全港1.7萬部八達通機，最遲明年9月完成，先可以落實。相關計劃其實係勞工及福利局嘅政策範疇，不過噚日喺創科相關嘅預算案記者會上，都有傳媒問創新科技及工業局長孫東會唔會協助調整後台系統，加快新方案實施，孫局長就話：「不太方便作相關回應。」
計劃將限制受惠人每月限搭最多240程、10蚊以上車費改以兩折計算，但先要八達通公司完成調整系統。孫東噚日回答，據佢了解，系統嘅後台設施涉及八達通同相關機構，相信相關部門會同相關企業探討，因此「不太方便作相關回應」。不過佢都藉此機會講到要推動社會運用科技，實際上應該依靠「我們的企業、我們的業界」，政府責任係「提供政策的指引、創造好的氛圍，以及在重點的方向上提供必要的資金支持」。
