【明報專訊】「財爺」陳茂波噚日喺立法會宣讀《財政預算案》，以往都有官員同立法會議員襯番嗰年預算案封面顏色嘅衫出席會議，今年預算案封面係湖水藍，Emily噚日見到教育局長蔡若蓮著咗湖藍色上衣，文體旅局長羅淑佩亦著咗藍色外衣。經民聯梁美芬、民建聯郭玲麗同林琳、選委界陳曼琪等議員亦身穿藍色嘅西裝外套，會議開始前佢哋仲一齊「打卡」。身兼行政會議召集人嘅葉劉淑儀除咗著湖水藍嘅外套現身，仲戴多咗副「黑超」。
Emily噚日喺立法會觀察，除咗一眾女官員同議員有用藍色「襯衫」，保安局長鄧炳強同新民黨李梓敬、民建聯周浩鼎等男士都有配搭湖水藍嘅領呔。
戴黑超嘅葉太行入會議廳前，同傳媒解釋自己眼部發炎，所以要「擋一擋」。不過，葉太會後同行會成員見記者嘅時候，已經除低咗「黑超」，有記者亦慰問葉太，提問前問「眼應該無乜事呀嘛？身體健康」，葉太亦點頭回應一句「有心」。