【明報專訊】立法會議員陸頌雄噚日同工聯會屯門團隊提出屯門海濱發展建議，話想打造成「青山灣漁人碼頭」，範圍覆蓋成個屯門碼頭至青山灣嘅海濱及水域，包括因電影《幻愛》而聞名嘅幻愛浪漫橋及小燈塔，同埋對岸嘅三聖邨海鮮市場一帶。
陸頌雄仲提出，政府可以考慮鼓勵太白海鮮舫喺青山灣重置，認為可以成為聯動嘅觀光地標。佢引述資料話，太白海鮮舫喺1960年代曾經喺屯門容龍別墅對開嘅青山灣營業。
工聯會話改善河道同海岸，除咗改善環境，更重要係推動社區文化同經濟發展，但政府需要改善避風塘停泊管理及規劃、改善屯門河水質、落實屯門至荃灣一段青山公路單車道，同埋改善避風塘鄰近遊樂設施嘅交通連接等。團隊又提出重新規劃用地，以單車徑連接整個青山灣，打造一個從蝴蝶灣，經過青山灣、三聖墟及三聖海鮮市場，連接黃金海岸嘅大型休閒區。