【明報專訊】運輸署上禮拜四（20日）中午展開首次車牌號碼網上拍賣，噚日結束，賣出50個車牌，總成交價超過63萬元，最貴係「AA 681」，6萬元成交，其次就係5萬元成交嘅「JH 522」。最平嘅「MT3612」就2000元有交易。
過往車牌競投都係搞實體拍賣會，運輸署舊年12月推出「拍牌易」普通車牌網上拍賣平台，畀有意競投嘅人唔使現身，用電腦或手機篤下手指就可以出價，成功投得心頭好之後，亦可以網上畀錢。
運輸署話今次拍賣所得款項，扣除開支後全數撥入政府獎券基金做慈善。署方認為今次「拍牌易」運作暢順，平台嘅各項競投功能、例如單次出價、拍賣期間自動出價、拍賣前預設自動出價等運作良好。下次車牌網上拍賣會喺下月20至24日舉行，署方話會檢視運作，再逐步增加拍賣次數。
