【明報專訊】立法會年底換屆選舉，社福界議員、新思維主席狄志遠噚日話，希望該黨下屆立法會可以繼續有一個功能界別議席，同時想爭取「最好有兩個」直選議席，認為黨內嘅人有條件參選，但係咪入到閘甚至當選，就要睇客觀條件，包括選舉經費、拎到嘅提名數目等，暫時未定出戰嘅選區，𠵱家有辦事處嘅將軍澳同油麻地都會考慮。
狄志遠話新思維喺議會只有一把聲音，但唔可以放棄自己，佢承認一把聲音未必做到好偉大嘅事，但以政府加開多個編外職位為例，自己每次都投反對票，有時係唯一嘅反對，慢慢社會都有迴響，形容係「唔成功嘅積極作用」。
新思維嘅財政一直「危危乎」，狄志遠話準備緊今年嘅籌款晚宴，暫定喺6月，希望最少籌到50萬元，應該夠未來年幾嘅運作，籌到100萬元、甚至200萬就更理想，會用嚟做選舉儲備。
百日內未提政改 狄志遠冀今年兌現
今屆立法會剩餘日子唔夠一年，狄志遠當選時承諾上任100日內提出重啟政改嘅議員議案，佢承認做唔到，但希望今年內做到，畀個交代選民，「唔想不了了之」。佢重申「雙普選」係政府嘅憲制責任，同時需要社會先有共識，否則只會變成爭拗。