【明報專訊】經民聯立法會議員陸瀚民鍾情跑步，噚日伙拍太太洪綺敏、議員鄭泳舜及另一跑友組成跑隊，參加「中移動香港行山節」，去西貢東郊野公園跑山。佢哋參加嘅「越野跑比賽」邀請賽賽程只有4.5公里，對跑慣長跑嘅議員嚟講濕濕碎，陸瀚民賽後報喜，話有幸獲得隊制組別第三名，4人仲selfie曬獎牌。
噚日跑山活動吸引逾900人參加，現場山頭非常熱鬧。大會今年邀請紀律部隊、輔助部隊及制服團隊參賽，讓佢哋展現團隊拼搏精神及團體合作精神。陸瀚民話，一向倡議做大香港嘅跑步產業，話香港一年有幾百場賽事，有助吸引外地跑手來港，更可促進體育產品、酒店、飲食等本地經濟。
鄭泳舜亦話香港山徑距離市中心好近，風景獨特，期望活動日後能吸引更多市民及遊客參與，佢亦期望政府推動綠色生態旅遊之時要優化山徑及配套，咁先方便到大家享受郊遊。