【明報專訊】立法會噚日搞新春午宴，特首李家超、行政會議成員、政府官員都有出席。今年係蛇年，立法會主席梁君彥致辭時以「蛇」嘅特質比喻香港，又叫在座各人發揮蛇嘅特質，自我更新蛻變，引來台下一片哄動。
靈敏觸覺掌民情 自我更新蛻變
大主席話蛇喺中國文化象徵智慧、靈巧同生命力，又識脫皮，仲要識搵安全、安靜嘅地方脫皮，代表佢哋會自我更新蛻變，以持續健康成長，就好似香港嘅發展史咁，係一幕又一幕蛻變成長、不斷開創突破嘅歷程。
佢又話特首同佢一樣相信在座賓客都會發揮蛇嘅特質，以靈敏嘅觸覺掌握民情，以貼地嘅行動為市民排憂解難，並以自我更新蛻變嘅基因，敢於破局，勇於改革。
另外，今年係今屆立法會嘅最後一個年度，梁君彥話今年立法議程有24項法案，加上政府稍後可能有新法案提交立法會，連同去年延續至今年嘅11項法案，預計會期中止前要完成審議40項法案，接近之前3年總數嘅一半。