【明報專訊】今年係選舉年，每次臨近選舉各大政黨都會用盡方法宣傳拉票，新民黨主席葉劉淑儀噚日喺立法會交通事務委員會就問電車公司會唔會放寬廣告政策，畀政黨喺電車車身賣廣告。葉太話政黨政團好鍾意電車，因為電車行得慢，「如果將我哋啲相貼上去，好有幫助」，仲即場問有冇特價，不過電車公司董事總經理戴弘博喺會上就直接拒絕。
戴弘博話電車一直嘅政策都係保持政治中立，強調電車公司係交通營辦商，喺政治入面「站隊（take sides）」唔係公司嘅目標同使命。
葉太追問綠色廣告？ 戴弘博：NGO或有優惠
戴弘博補充，政府部門或者NGO（非政府機構）想喺車身賣廣告，都要遵守一定條件，唔可以有冒犯內容。運物局副秘書長葉海鷹就話，相信公共交通營辦商各有內部守則同考慮。
電車公司目前由法國公司RATP Dev全資擁有，葉太追問，如果廣告內容同氣候變化、環境可持續呢啲「法國都好支持」嘅理念有關，又得唔得，同埋有無得平啲呢？戴弘博回應話，如果有NGO宣傳有意義嘅使命（mission），可能有優惠。呢個答案葉太終於收貨，話會後再同電車公司跟進。